26.03.2012

,,შეწყდეს სექსისტური პროპაგანდა”

სტატიები  (photo: )


გადაცემა ,,ქალური ლოგიკის” დახურვის მოთხოვნით დღეს ტელეკომპანია "იმედთან" მოქალაქეებმა საპროტესტო აქცია გამართეს და ტელეკომპანიაში პეტიცია შეიტანეს.

ხელმოწერებს შეგროვება სამოქალაქო აქტივისტებმა რამდენიმე დღის წინ დაიწყეს. ამჟამად გადაცემის შეწყვეტის მოთხოვნას 956-მა ადამიანმა მოაწერა ხელი. აქციის ორგანიზატორებისა და მონაწილეების თქმით, ,,ქალური ლოგიკა” სექსისტური გადაცემაა, რომელიც ქალებს მიზანმიმართულად წარმოადგენს სულელ არსებებად.

,,ჩემი აღშფგოთება გამოიწვია ამ გადაცემის იდეამ, რომელიც ქალის სულელ, უჭკუო არსებად წარმოჩენას ემსახურება. ეს გადაცემა სათაურშივე გულისხმობს, რომ ქალური ლოგიკა მამაკაცის ლოგიკისგან განსხვავდება და მასზე ნაკლებია." - ამბობს აქციის მონაწილე გიორგი ძნელაძე.

,,თვითონ გადაცემის ფორმა ისეთია, რომ ქალები დოღის ცხენებივით არიან გამოყვანილი, რომლებზეც მამაკაცები რაღაც ფსონს დებენ, ერთმანეთს ეჯიბრებიან და ქალი არც არაფერს იგებს ამ გადაცემაში, უბრალოდ გაფორმება, ლამაზი თოჯინაა”- ამბობს მარიამ გაგოშაშვილი.

გენდერის სპეციალისტი, ეკა აღდგომელაშვილი გადაცემას "გულისამრევს" უწოდებს და არა მხოლოდ ქალებისადმი, არამედ ზოგადად ადამიანისადმი დაცინვად მიაჩნია. მისი თქმით, მედია ასოციაციის მეშვეობით ზოგადად ქალების სტიგმატიზებას ახდენს, რადგან ქალების ვიზუალურ გამოსახულებას ებმის შინაარსი მათი დაბალი ინტელექტის შესახებ. მართალია, ქართულ კულტურას პატრიარქალურ კულტურად აფასებენ, მაგრამ აღდგომელაშვილს მიაჩნია, რომ ,,ქალური ლოგიკის” სულისკვეთება ამ კულტურის ფარგლებშიც კი არ ჯდება და ზედმეტად ხელოვნურია.

მარტში ქალებს ანალოგიური მოტივით ,,ჯიპიაი ჰოლდინგის” სარეკლამო პოსტერების გაპროტესტება მოუხდათ, სადაც აქცენტი იმაზე იყო გაკეთებული, რომ ქალებს არათუ ავტომობილის მართვა, არამედ, მაკიაჟის გაკეთებაც კი არ შეუძლიათ.

"იმედის" საინფორმაციო სამსახური და ჟურნალისტები საკუთარი შენობის წინ გამართული აქციით არ დაინტერესებულან. როგორც აქციის მონაწილეები ამბობენ, "იმედი" ერთადერთი არ არის და ქართული მედია სექსიზმითაა გაჯერებული.

საქართველოში საჯარო თუ კერძო (მათ შორის, ოჯახური) ცხოვრების სფეროებში გენდერულ თანასწორობას უზრუნველყოფს საქართველოს კანონი გენდერული თანასწორობის შესახებ, რომელიც პარლამენტმა 2010 წელს მიიღო. ამას გარდა სახელმწიფო მიერთებულია ქალის დისკრიმინაციის ყველა ფორმის აღმოფხვრის შესახებ გაეროს კონვენციას, CEDAW კონვენციას, რომელიც სახელმწიფოებს ცხოვრების ყველა სფეროში ქალისა და მამაკაცისათვის თანასწორი შესაძლებლობების შექმნის ვალდებულებას უდგენს.

იმის მიუხედავად, რომ გენდერული თანასწორობისთვის საკანონდმებლო გარანტიები მეტ-ნაკლებად არსებობს,რეალურად სხვა მდგომარეობაა. სტატისტიკის დეპარტამენტის მონაცემებზე პროფკავშირების მიერ ჩატარებული კვლევის მიხედვით ქალებს საქართველოში მამაკაცებზე თითქმის ორჯერ ნაკლები შრომის ანაზღაურება აქვთ. პარლამენტში ქალების რაოდენობა მხოლოდ 6,5 %-ია, მიუხედავად იმისა, რომ უმაღლესი ან საშუალო განათლება ქვეყანაში ზრდასრული ქალების 64%-ს აქვს, მამაკაცების კი მხოლოდ 60%-ს. ამიტომაც, მკვლევარები ამ მდგომარეობას სხვადასხვა კულტურული წარმოდგენებითა და სტერეოტიპებით ხსნიან, რომელთა გავრცელებასა და ხელახლა დამკვიდრებაში მედიასაშუალებებიც მონაწილეობენ.

გაეროს ჰუმანური განვითარების ანგარიშებში საქართველოში გენდერული სტერეოტიპების მდგომარეობას განსაკუთრებული ყურადღება ეთმობა და გაერომ სახელმწიფოს არაერთხელ მოუწოდა დისკრიმინაციული სტერეოტიპებთან საბრძოლველად ქმედითი ზომების გატარებისკენ. ჰუმანური განვითარების 2011 წლის ანგარიშში საქართველოში გენდერული უთანასწორობის ინდექსი 0,418-ია. ის 146 ქვეყანას შორის 73-ე ადგილზეა და რეგიონის ქვეყნებიც კი უსწრებენ. მაგალითად, სომხეთი, რომელის ქვეყნების სიაში მე-60 ადგილს იკავებს.

[video:http://www.youtube.com/watch?v=8DJL6Ze9ppk&feature=player_embedded]

მეტი

ახალი ამბები

მეტი
  • თამარ კარელიძე

    უკრაინა - ჩვენი სხვისი ომი

    ჯარი პოლიტიკისაგან შორს უნდა იდგეს და თავისი მოვალეობა ქვეყნის ინტერესებიდან გამომდინარე შეასრულოს, თავდაცვის სამინისტროს განცხადება კი,  ცალსახად პოლიტიზირებულია, თან ისეთი, ქვეყნის ინტერესებს...

  • ნათია ფანჯიკიძე

    მთავარი როლის შემსრულებლები

    კულტურის ნებისმიერმა მინისტრმა უნდა შეიგრძნოს თავისი როლის მთავარი მოთხოვნა, რომ მას კულტურის მცველად, კულტურის განვითარების სტრატეგიის, კონცეფციის  შესაქმნელად ერგო ეს როლი და ამ მხრივ უნდა...

  • ლევან ბერიანიძე

    გენდერული კვოტირება

    პატარა გოგოების შესახებ ეს რამოდენიმე მარტივი მაგალითი იმიტომ მოვიყვანე, რომ მივხდეთ, რომ ძალადობა მარტო მკვლელობის აქტი არაა. “ძალას” ვხმარობთ მაშინაც როდესაც ჩვენ გოგოებს და ბიჭებს, კაცებს და...

მეტი