06.08.2012
თავდაცვის სამინისტროს ახალი კონცეფცია 3T-ს პრინციპს ეფუძნება
თავდაცვის უწყების სამოქმედო დოკუმენტი მინისტრმა დიმიტრი შაშკინმა დღეს წარადგინა. როგორც მინისტრი აღნიშნავს, კონცეფცია ე.წ. 3T-ს პრინციპს - ტოტალურ ზრუნვას, ტოტალურ წვრთნასა და ტოტალურ თავდაცვას გულისხმობს. კონცეფცია ძალაში 2013 წლიდან ეტაპობრივად შევა. როგორც მინისტრმა განმარტა ტოტალური ზრუნვა - სამხედრო მოსამსახურეებსა და მათ ოჯახის წევრებისათვის ჯანდაცვის ხელმისაწვდომობის გაზრდას, ტრანსპორტზე შეღავათების დაწესებას და სხვა სერვისებს გულისხმობს.
მინისტრის განცხადებით, სპეციალურად სამხედრო მოსამსახურეებისთვის შეიქმნება რეფერალური ფონდი.
თავდაცვის სამინისტრო 2013 წლიდან სამხედროები მოსამსახურეებისათვის და მათი ოჯახის წევრებისათვის განათლების სფეროში შეღავათების დაწესებასაც გეგმავს.
დიმიტრი შაშკინის განმარტებით, 3T-ს კონცეფციის დანარჩენი ორი პრინციპი ტოტალურ წვრთნასა და ტოტალურ თავდაცვას ეფუძვნება. მისი თქმით, ტოტალური ტრენინგი – ნატოში ინტეგრაციისთვისაა აუცილებელი, ხოლო ტოტალური თავდაცვა - ქვეყნის თავდაცვისუნარიანობის გაძლიერებას გულისხმობს, რომლის ერთ–ერთი უმნიშვნელოვანესი ნაწილი რეზერვის არსებობა და გაძლიერებაა.
ნინო ბექიშვილი