სტუდენტური ინკვიზიცია

გილოცავთ ჰომოსაპიენსებო!

2011 წლის აპრილში ადამიანთა მოდგმა განვითარების იმ ეტაპზე ავიდა, რომ FBI-მაც კი გაბედა და ოფიციალურად აღიარა უცხოპლანეტელების არსებობა.  ეს რევოლუციური მონეტა იყო კაცობრიობის მიერ დაგროვილი ცოდნის ყულაბაში.

2011 წლის აპრილშივე, ამ ამბიდან ორ დღეში არა ზოგადად კაცობრიობის, არამედ ქართული "ცოდნის ტაძრის", თსუ-ს ყულაბაშიც ჩავარდა ერთი მონეტა. პოტენციურად - ესეც რევოლუციური. ოღონდ, როგორც გუშინდელმა დღემ მანახა, გონებრივ რევოლუციამდე როგორც მინიმუმ ევოლუცია გვჭირდება. მაშინ, როცა მსოფლიოს წამყვანი თუ არაწამყვანი უნივერსიტეტების სტუდენტები ათასობით მოკვლევებს ატარებენ, ცოდნას იღებენ, საკუთარი ქვეყნის მომავალს და სხვა თუ არაფერი, Facebook-ს მაინც ქმნიან, თსუ-ს ქართველ სტუდენტებს წიხლის ქვეშ იგდებენ. ამავე უნივერსიტეტის "თვითმმართველობა" სტუდენტებს მხოლოდ იმიტომ სცემს, რომ ისინი ყველაზე, ყველაზე მარტივ მოთხოვნას აყენებენ: გვითარგმნეთ სასწავლო ლიტერატურა ქართულად.

აი რა მოხდა. (ძალიან მოკლედ მოგიყვებით, რადგან ამ თემაზე მართალია პირველად ვწერ, მაგრამ არა უკანასკნელად. გადავწყვიტე პოსტების სერია მივუძღვნა ამ დაობებულ, კორუმპირებულ და ფაშისტ სისტემას, რასაც თსუ-ს "თვითმმართველობა"-ს და მასთან დაახლოებულ ჯგუფებს ეძახიან, მათ შორის ლექტორებსა და დაცვის სამსახურის წევრებს). რამდენიმე სტუდენტის მიერ წამოწყებულმა დამოუკიდებელმა საინიციატივო ჯგუფმა, + რამდენიმე სტუდენტმა გადაწყვიტა სრულიად სამართლიანად დაესვა კითხვა: რატომ არ გვაქვს სასწავლო ლიტერატურა ქართულ ენაზე, მაშინ როცა:

1. უნივერსიტეტის ბიუჯეტიდან ლიტერატურის თარგმნისთვის გამოყოფილია 20,000 ლარი. მიზერია, მაგრამ ფაქტია, რომ თანხა გამოყოფილია.
2. განათლების მისაღებად თვითოუელი სტუდენტი საშუალოდ 2250 ლარს იხდის წელიწადში. თუ გავითვალისწინებთ, რომ თსუ-ს სტუდენტთა რიცხვი თითქმის 20,000 აღწევს (გრანტით ჩარიცხულების გადასახადს სახელმწიფო ფარავს), გამოდის, რომ თსუ-ს ბიუჯეტი მხოლოდ სწავლის გადასახადიდან მიღებული შემოსავლით წელიწადში საშუალოდ 45,000,000 ლარით ივსება.
3. და მესამე. უნივერსიტეტს კანონით მოეთხოვება, რომ სასწავლოდ არ დაუშვას საგანი, რომელშიც მინიმუმ რიდერიც კი არაა ქართულ ენაზე.

ეს იყო და ეს. მეტს არც არაფერს კითხულობდნენ თავისუფალი სტუდენტები. პასუხები ასეთი იყო:

1. "20,000 ლარი კი არის გამოყოფილი, მაგრამ სად მიდის კაცმა არ იცის"
2. "თსუ-ს ბიუჯეტის 80% ლექტორების ხელფასებში მიდის"
3. "შენი დედა მოვტყან"

ან გაგიკვირდებათ, ან არც, თუ ვიტყვი, რომ პირველი ორი პასუხი საკითხზე პასუხისმგებელ ოფიციალურ პირებს ეკუთვნით, რომლებიც ხელფასებს ისევდაისევ ამ სტუდენტების გადასახადებიდან იღებენ. პირველი იმდენად ბრიყვია, რომ საკუთარ ტოტს იჭრის და თვითონ სვამს კითხვას, სად მიდის ეს 20,000 ლარიო. მეორე იმდენად ბრიყვია, რომ გვეუბნება, ათეულობით მილიონიანი ბიუჯეტის 80% ლექტორების ხელფასებს ხმარდებაო. მესამე პასუხი კი, გინება თავის მუშტებიანად ყველაზე დიდ ბრიყვებს ეკუთვნით. ამ პასუხის ავტორი თსუ-ს "თვითმმართველობაა".

თავისუფალი, არაპარტიელ-არაკომკავშირელი სტუდენტების გუშინდელი, გასაოცრად ორგანიზებული, სამართლიანი და ობიექტური პრეზენტაცია სახელწოდებით "თარგმნე!" თვითმმართველობის "კომკავშირელმა" წევრებმა მუშტებითა და წიხლებით ჩაახშეს. პირდაპირი გაგებით: მუშტებითა და წიხლებით ჩაახშეს! მიზეზი ის რამდენიმე კრიტიკული შენიშვნა იყო, რომელიც სტუდენტებმა ღიად დააფიქსირეს. მოდი და ნუ დაეთანხმები, როცა იცი, რომ თვითმმართველობის საქმიანობა ხინკალ-ფართებს, ექსკურსიებსა და ტაშ-ფანდურს არ სცილდება. არადა, მათ წესდებაში ასეთ რამეებსაც ვნახულობთ:

მუხლი 7.

სტუდენტური თვითმმართველობის მიზნებია:

ა) თავისი უფლებამოსილების ფარგლებში, დაიცვას და წარმოადგინოს სტუდენტების უფლებები და კანონიერი ინტერესები როგორც უნივერსიტეტში, ისე მის ფარგლებს გარეთ;
ბ) თავისი უფლებამოსილების ფარგლებში, ხელი შეუწყოს სტუდენტებს უფლებებისა და თავისუფლებების პრაქტიკულ რეალიზაციაში;
გ) დაეხმაროს სტუდენტებს მაღალკვალიფიციური განათლების მიღებაში, თვითრეალიზებასა და დამოუკიდებელი აზროვნების ჩამოყალიბებაში;
დ) დახმარება გაუწიოს სტუდენტებს სწავლის პერიოდში, პროფესიული უნარ-ჩვევებისა და კონკურენტუნარიან პროფესიონალად ჩამოყალიბებაში;
ე) ხელი შეუწყოს უნივერსიტეტის ინტეგრაციას ევროპულ საგანმანათლებლო სივრცეში და მაქსიმალურად უზრუნველჰყოს ამ პროცესში სტუდენტთა მონაწილეობა;
ვ) ხელი შეუწყოს სტუდენტებში სამართლებრივი თვითშეგნების დონისა და კანონისადმი პატივისცემის ამაღლებას, დახმარება გაუწიოს საქართველოში დემოკრატიული ღირებულებების დამკვიდრებას და სამოქალაქო საზოგადოების ჩამოყალიბებას;

გუშინდელი დღით თუ ვიმსჯელებთ, სრული პასუხისმგებლობით შეიძლება ითქვას, რომ მათ ზემოთ ჩამოთვლილი ხუთივე პუნქტი დაარღვიეს. მეტიც, თავდაყირა დააყენეს საკუთარი წესდება და ყველა ნორმა, რომლითაც მინიმუმ აკადემიური სივრცე უნდა რეგულირდებოდეს.

აკადემიური სივრცე(?!) პრობლემაც აქაა. მუშტი-კრივს ესწრებოდნენ ლექტორები (მაგალითად, ამირან ბერძენიშვილი), რომლებსაც არათუ ხელი, ენაც კი არ გაუნძრევიათ საკუთარი სტუდენტების მუშტებისგან დასაცავად. (გამონაკლისია ლელა გაფრინდაშვილი, რომელიც პირდაპირ ჩაერთო ამ ტოტალურ პრიმიტივიზმთან კონფრონტაციაში). რაღა სათქმელია ის, რომ ამავე უნივერსიტეტის დაცვის თანამშრომლებმა ხელიც კი არ გაანძრიეს წიხლქვეშ გაგდებული სტუდენტების დასაცავად.

რაკიღა ვთქვი, რომ ამ საკითხზე პოსტების სერიას დავიწყებ, ამჯერად დელატების აღწერას არ შევუდგები. მომხდარის ფოტო-ვიდეო მასალას უახლოეს დღეებში მოგაწვდით. იქამდე კი ერთი-ორ ამბავსაც მოგითხრობთ.

გუშინ საღამოსვე მეგობრებს შევხვდი. გადავწყვიტე ჩემს ცხოვრებაში ერთ-ერთი ყველაზე დიდი ფრუსტრაციის დღის ბოლოს შედარებითი განტვირთვა ალკოჰოლით მომეხდინა. მაგიდაზე ჩვენთან ერთად მეგობრის თანამშრომელი, ასე 50-60-იოდე წლის კაცი აღმოჩნდა. ადამიანი, რომელიც საკუთარ თავს "კომუნისტებისდროინდელ ყოფილ ჩინოვნიკს" უწოდებდა და საქართველოს სადღეგრძელოსთან ერთად საკმაოდ გულახდილადაც ყვებოდა, რა მამაძაღლობები უკეთებია ამ "ჩინოვნიკობისას", თსუ-ს თვითმმართველობის ერთ-ერთი წარმომადგენლის მამა ყოფილა. აი მაშინ მივხვდი, რას ნიშნავს გამოთქმა, ვაშლი ხიდან ძალიან შორსაც არ ვარდებაო. იქამდე კი, უნივერსიტეტის შენობიდან გამოსულს, თვითმმართველობის წარმომადგენელმა მომაძახა: "სახეზე გიმახსოვრებთ და იცოდე, გამზრდელს მოგიტყნავ".

კაცმა არ იცის, იყო თუ არა ამ მუქარის ავტორი იმ კაცის შვილი, ვინც სხვა ყველაფერთან ერთად იმასაც მეუბნებოდა, ჩემი შვილების თაობა კარგ ქვეყანას ააშენებს, მჯერა ამისიო. ჯეროდეს! მე კი სხვა რამეების მჯერა უკვე, რომ ვაშლი ხიდან ძალიან შორს არ ვარდება, რომ ამ კაცის შვილიც წლების მერე პათეტიკურად "მოინანიებს" თავის მამაძაღლობებს და ასე, მონანიებული, გულზე მჯიღის რტყმევით შესვამს ქვეყნის მაშენებელი ახალი თაობის სადღეგრძელოს. ოღონდ, ისეთი თაობისას, რომელიც გუშინ წიხლქვეშ გაიგდეს. როდის იყო პარტიის ინკვიზიტორები და სისტემის მონები კარგ ქვეყანას აშენებდნენ? ერთი ასეთი იმპერია თავზე უკვე ჩამოექცა იმ ჩემს გუშინდელ ყოფილკომუნისტებისდროინდელ ჩინოვნიკ "თანამეინახეს". კიდევაც ჩამოიქცევა ასეთი დაობებული სისტემები, თუკი რათქმაუნდა თავისუფალი და დამოუკიდებელი სტუდენტობა და ახალგაზრდობა იმას იზავს, რაც გუშინ "თარგმნე"-ს ინიციატორებმა და რამდენიმე სტუდენტმა ქნეს.

ბოლო ამბავი: ორი თსუ-ელი, რომელსაც გუშინ დაემუქრა თვითმმართველობა, დღესაც სცემეს. როგორც უკვე გითხარით, მეც დამემუქრნენ, "სახეზე გიმახსოვრებთ და გამზრდელს მოგიტყნავთ"-ო. ხოდა, აი ჩემ ფოტოსაც დავდებ აქ, კარგად რომ დაგამახსოვრდეთ.

მაინც გილოცავთ, ჰომოსაპიენსებო! კაცობრიობის განვითარებული ნაწილი უკვე უცხოპლანეტელების არსებობის ოფიციალურ დადასტურებაზე მსჯელობს, სხვა უნივერსიტეტის სტუდენტები როგორც მინიმუ, Facebook-ის გამოგონებით 26 წლის ასაკში მილიარდელები ხდებიან. სამაგიეროდ, მოსალოცი ამბავი ნამდვილად არაა, როცა სტუდენტები აკადემიურ სივრცეში იმ მინიმუმსაც კი ვერ იღებენ, რასაც ნათარგმნი ლიტერატურა და უსაფრთხოების გარანტიები ჰქვია. ხოდა, იმასაც გილოცავთ, რომ სტუდენტებმა აკადემიური ამბოხი დაიწყეს, თორემ როდის იყო მიწაზე გაგორებული ვაშლები ქვეყანას აშენებდნენ.

P.S. იხილეთ სტუდენტების მიერ ჩატარებული გამოძიება ლიტერატურის თარგმნასთან დაკავშირებით.